ਞਅੱਜ ਕਲ ਦਿਨ ਚੜ੍ਹਦੇ, ਫੇਸਬੁਕ ਖੁਲਦੇ ਹੀ, ਨਿਰਣੇ ਕਾਲਜੇ ਚਰਚਾ ਸ਼ੁਰੂ ਹੋ ਜਾਂਦੀ ਹੈ। ਕੌਣ ਜਿਤਿਆ ਕਿਉਂ ਜਿਤਿਆ, ਕੌਣ ਹਾਰਿਆ ਕਿਉਂ ਹਾਰਿਆ,ਕਿਸਦੀ ਜ਼ਮਾਨਤ ਜਬਤ ਹੋਈ। ਜੇ ਆ ਗਲਤੀ ਨਾਂ ਹੁੰਦੀ ਤਾਂ ਨਿਰਣੇ ਕਾਲਜੇ ਫੈਸਲਾ ਕੋਈ ਹੋਰ ਹੋਣਾ ਸੀ।

ਤਰਕਸ਼ੀਲ ਜੋ ਮਰਜੀ ਕਹਿੰਣ ਪਰ ਨਿਰਣੇ ਕਾਲਜੇ ਦੋ ਕੁ ਪਰੌਂਠੇ ਹੀ ਖਾਧੇ  ਜਾ ਸਕਦੇ ਹਨ।

ਇਹ ਸ਼ਬਦ ਬਚਪਣ ਤੋਂ ਹੀ ਸੁਣਦਾ ਆ ਰਿਹਾ ਹਾਂ, ਜਾਹਰ ਹੈ ਤੁਸੀਂ ਵੀ ਸੁਣਿਆ ਹੋਵੇਗਾ। ਛੋਟੇ ਹੁੰਦਿਆਂ ਕਦੇ ਧਿਆਨ ਹੀ ਨਹੀ ਦਿੱਤਾ ਕਿ ਨਿਰਣਾ ਕਾਲਜਾ ਹੁੰਦਾ ਕੀ ਹੈ? ਕਈ ਹੋਰ ਸ਼ਬਦ ਵੀ ਹੁੰਦੇ ਸਨ ਜੋ ਬੀਬੀ ਦੇ ਸਰਕਲ ਵਾਲੀਆਂ ਵਰਤਦੀਆ ਸਨ। ਢਿਡ ਵਿਚ ਗੈਸ ਦਾ ਗੋਲਾ ਬਣਿਆ ਹੋਇਆ ਹੈ। ਫਲਾਣੀ ਨੂੰ ਧਰਨ ਪੈ ਗਈ।

ਹੁਣ ਧਰਨ ਕੀ ਹੁੰਦੀ ਹੈ ਪਰ ਹਰ ਗਲੀ ਮੁਹੱਲੇ, ਪਿੰਡ ਵਿਚ ਇੱਕ ਦੋ ਸਪੈਸ਼ਲਿਸਟ ਹੁੰਦੀਆਂ ਸਨ। ਉਨ੍ਹਾਂ ਨੂੰ ਸੱਦਾ ਜਾਂਦਾ ਸੀ। ਕੈਰਿਉ ਪਰੈਕਟਿਰ ਹੀ ਦਸ ਸਕਦੇ ਹਨ ਕਿ ਇਹ ਕੀ ਬਲਾ ਹੈ ਪਰ ਧਰਨ ਠੀਕ ਜ਼ਰੂਰ ਹੋ ਜਾਂਦੀ ਸੀ।

ਹੁਣ ਮੁੜਦੇ ਹਾਂ ਨਿਰਣੇ ਕਾਲਜੇ ਵੱਲ। ਡਾਕਟਰ ਇਹ ਸ਼ਬਦ ਨਹੀ ਵਰਤਦੇ। ਸਾਡੀ ਡਾਕਟਰ ਖਾਲੀ ਪੇਟ ਕਹਿ ਦਿੰਦੀ ਹੈ। ਮਤਲਬ ਜਦੋਂ ਸਵੇਰੇ ਕੁਝ ਨਾਂ ਖਾਧਾ ਹੋਵੇ।

ਦੇਸੀ ਇਲਾਜ਼ ਦਸਣ ਵਾਲੇ ਬਹੁਤੇ ਇਹੋ ਕਹਿੰਦੇ ਹਨ ਕਿ ਇਹ ਨਿਰਣੇ ਕਾਲਜੇ ਲੈਣਾ ਹੈ।

ਕਲੋਂਜੀ ਦਾ ਚਪਾ ਕੁ ਚਮਚਾ ਲੈਕੇ ਪਾਣੀ ਪੀਣਾ ਹੈ, ਅਲਸੀ ਦਾ ਪਾਉਡਰ,ਵੀ ਨਿਰਣੇ ਕਾਲਜੇ ਲੈਣਾ ਹੈ,ਹੋਮਿਉਪੈਥੀ ਦੀ ਦਵਾਈ ਵੀ ਨਿਰਣੇ ਕਾਲਜੇ, ਲੱਸਣ ਵੀ ਨਿਰਣੇ ਕਾਲਜੇ। ਕੱਚਾ ਆਉਲਾ ਵੀ ਨਿਰਣੇ ਕਾਲਜੇ।ਜੀਰਾ ਤੇ ਕਾਲੀ ਮਿਰਚ ਤੇ ਜਵੈਣ ਦਾ ਮਿਕਸਚਰ ਵੀ ਨਿਰਣੇ ਕਾਲਜੇ, ਇੱਕ ਪੂਰੀ ਲਿਸਟ ਬਣੀ ਪਈ ਹੈ ਜੋ ਨਿਰਣੇ ਕਾਲਜੇ ਖਾਣ ਵਾਲੀ ਹੈ।

ਜੇ ਸਾਰਾ ਕੁਝ ਨਿਰਣੇ ਕਾਲਜੇ ਖਾ ਲਵੋ ਤਾਂ ਬਰੇਕ ਫਾਸਟ ਦੀ ਲੋੜ ਖਤਮ ਹੋ ਜਾਂਦੀ ਹੈ।